आमदार सुरेश धस यांच्या मुलाच्या वाहनाचा अपघात; दुचाकीस्वाराचा मृत्यू

Suresh Dhas Son Sagar Accident News :  पारनेरच्या सुपा शिवारातील जातेगाव फाट्यावर भाजप (BJP) आमदार सुरेश धस (Suresh Dhas) यांच्या मुलगा सागर (Sagar Suresh Dhas) याच्याकडील वाहनानं झालेल्या अपघातात दुचाकीस्वाराचा मृत्यू झाला असल्याची माहिती समोर आली आहे. सध्या या प्रकरणात पारनेर तालुक्यातील सुपा पोलीस ठाण्यात गुन्हा दाखल करण्यात आला आहे. या अपघातामध्ये नितीन शेळके (वय 34, पळवे खुर्द, ता. पारनेर) या दुचाकीस्वाराचा मृत्यू झाला आहे.

सध्या समोर आलेल्या माहितीनुसार, अपघातावेळी वाहनात सागर सुरेश धस आणि सचिन दादासाहेब कोकणे हे दोघे जण होते. अपघातादरम्याने सागर सुरेश धस यांच्या वाहनाने दुचाकीस्वाराला मागून धडक दिली असल्याची माहिती समोर आली आहे.  रात्री साडेदहा ते अकराच्या दरम्यान ही घटना घडली. दुचाकीस्वार नितीन शेळके जातेगाव फाट्याकडून पारनेरकडे येत होते. यावेळी सागर धस यांच्या वाहनाने मागून जोरात धडक मारली असल्याची माहिती समोर आली आहे.

अपघात झाल्यानंतर माहिती सुपा पोलिसांना कळवण्यात आली. यानंतर जखमी दुचाकीस्वाराला उपचारासाठी रुग्णालयात दाखल करण्यात आले होते मात्र उपचारादरम्यान नितीन शेळके यांचा मृत्यू झाला. सागर धस हे रात्री आष्टीवरून पुण्याच्या दिशेला निघाले होते. पोलिसांनी सागर धस यांच्याकडे असणारी वाहन ताब्यात घेतली असून या अपघाताची नोंद घेतली आहे. या धडकेनंतर दुचाकीचे आणि सागर धस यांच्या गाडीचे मोठे नुकसान झाले आहे. तर वाहनातील सागर आणि सचिन या दोघांची वैद्यकीय तपासणी करण्यात आली असल्याची माहिती देखील समोर आली आहे.

चार वर्षांची चिमुकली तिसऱ्या मजल्यावर अडकली अन् घडलं असं काही…,व्हिडिओ व्हायरल 

संबंधित बातम्या